Hvammstangi er snyrtilegur og hlýlegur bær sem er tilvalinn áfangastaður. Staðurinn stendur 6 km frá þjóðveginum við Miðfjörð á leiðinni út á Vatnsnes og þar búa um 600 manns. Verslunarsaga staðarins nær yfir rúm 100 ár. Í Selasetri Íslands er hægt að skoða fræðslusýningu um seli við Ísland og þar er upplýsingamiðstöð Húnaþings vestra til húsa. Í sundlauginni geta ferðalangar látið þreytuna líða úr sér í heitu pottunum eða tekið hressandi sundsprett. Skjólgott tjaldstæðið í Kirkjuhvammi býður upp á þægilegt þjónustuhús og stutt er í spennandi gönguleiðir. Þjónustustig á Hvammstanga er hátt og þar er m.a. að finna banka, pósthús, kaffihús, kjörbúð, heilsugæslu/sjúkrahús, tannlæknaþjónustu, lyfsölu, hárgreiðslustofu, bifreiðaverkstæði, bílasölu, sláturhús og fjölbreytt smærri fyrirtæki í ýmsum greinum.
Laugarbakki stendur við þjóðveginn ofan við Miðfjarðará. Þar er jarðhiti sem nýttur er fyrir þorpið og þéttbýlið á Hvammstanga. Handverkshúsið Langafit stendur á Laugarbakka og þar er einnig svefnpokagisting og tjaldsvæði við félagsheimilið Ásbyrgi sem er leigt út fyrir ættarmót. Í Grettisbóli er rekið setur til heiðurs Gretti sterka og þar er haldin árlega Grettishátíð. Þar er einnig að finna Hótel Laugarbakka. Yfir sumarið liggur tiltölulega greiðfær vegur upp úr Miðfjarðardölum fram að Arnarvatni.
Borðeyri við vestanverðan Hrútafjörð er eitt fámennasta þorp landsins. Staðarins er getið í fornum heimildum og var hann lengi mikill verslunarstaður fyrir sveitirnar í kring. Í dag er þar rekinn leik- og grunnskóli, bifreiðaverkstæði og ferðaþjónusta í Tangahúsi. Eitt elsta hús staðarins er Riis hús, reist 1862. Það hefur verið gert upp að utan og setur mikinn svip á staðinn. Með sameiningu Húnaþings vestra og Bæjarhrepps árið 2012 er Borðeyri nú hluti af sameinuðu sveitarfélagi Húnaþings vestra.
